အမေး.. ။ပစ္စက္ခ နိုင်ငံရေး အခြေအနေဟာ အကောင်းဘက်ကို သွားဖို့အတွက် ခြေလှမ်းပြင်နေတယ် လို့ ပြောလို့ရမလား။
အဖြေ....။ ဒီလိုပဲ မြင်ပါတယ်။ ဒါပေမဲ့လည်း မျှော်လင့်တယ်ပေါ့နော်။ ကျွန်မအမြဲပဲ ပြောသလိုပဲ။ မျှော်လင့်လို့ရှိရင် အလုပ်လုပ်ရမယ်။ အကောင်းဘက်တော့ ရောက်မှာပဲ ဆိုပြီး မျှော်လင့်ပြီးတော့ ခံယူလို့ မရဘူး။ အကောင်းဘက်ကို ရောက်စေချင်ရင် အကောင်းဘက်ကိုလည်း ရောက်နိုင်တဲ့ အခွင့်အရေးတွေ ရှိနေပြီလို့ဆိုရင် ပိုပြီး ကြိုးစားရမယ်။ ပိုပြီးတော့ ကိုယ်က အလုပ်လုပ်ရမယ်။ အကောင်းဘက်ကို မြန်မြန် ရောက်သွားအောင်လို့။ ဘာဖြစ်လို့လဲဆိုတော့ လူတွေ ပြောကြတာပေါ့နော်။ အစကောင်းမှ အနှောင်း သေချာလို့။ ကြားကာလ တွေလည်း အများကြီး ရှိသေးတယ်လေ။ အစလေး ကောင်းရုံနဲ့ အလိုလိုကို သူ့ဟာသူဒီအတိုင်း ဆက်ဆက် ဆက်ဆက်ပြီးတော့ အနှောင်း သေချာတဲ့ဆီ ရောက်သွားမှာ မဟုတ်ဘူး။ အစ စပြီးကတည်းက ဆက်ဆက်ပြီး လုပ်နေရမှာပဲ။ ဘဝ ဟာဒီလိုပါပဲ။ နေ့တိုင်းနေ့တိုင်း ကြိုးစားရမှာပဲ။
အမေး.......။အစိုးရနဲ့ အလုပ် သဘောပါတဲ့ ဆွေးနွေးမှုတွေ ဘယ်တော့လောက် စဖြစ်မယ်ထင်လဲ။
အဖြေ....။ ဒါကတော့ ဖြစ်တဲ့အခါ သိရမှာပေါ့။ ကျွန်မက အဲဒီလို ခန့်မှန်းပြီး ပြောတာ သိပ်မလုပ်ချင်ဘူး။ ခန့်မှန်းပြီး ပြောတာ ခန့်မှန်းချက်ဟာ ခန့်မှန်းချက်ပဲ။ လွဲသွားတဲ့အခါကျ ရင်လည်း မကောင်းဘူး။ လွဲသွားတဲ့ အခါကျရင် မကောင်းဘူးဆိုတာ ဒီလိုပါ။ တမင်သက်သက် နားလည်မှု လွဲအောင် လုပ်နေသလို ဖြစ်မှာစိုးလို့ပါ။
အဖြေ......။ဒါကတော့ အများကလည်း မြင်တယ်။ ကျွန်မလည်း အမှန် ပြောရလို့ရှိရင် ပိုပြီးတော့ သွက်သွက် လက်လက် သွားလို့ရှိရင် တိုင်းပြည်အတွက်လည်း ကောင်းမယ်။ ဒီမိုကရေစီ ဖြစ်ထွန်းရေးအတွက် ကောင်းမယ်လို့မြင်တယ်။
အမေး.......။ အစိုးရရဲ့ အခုလက်ရှိ တွေ့ဆုံ ဆွေးနွေးမှုဟာ တိုင်းပြည်အတွက် တကယ်စေတနာ ထားတဲ့ တွေ့ဆုံ ဆွေးနွေးမှုလား။ ဒါမှမဟုတ် တချို့တွေကျတော့ အရင်က အတွေ့အကြုံတွေ ကို အခြေခံပြီးတော့ အစိုးရက နိုင်ငံတကာ ထောက်ခံမှုကို လိုချင်တဲ့အတွက် ဒေါ်စုနဲ့ တွေ့ဆုံ ဆွေးနွေးတဲ့ပုံစံနဲ့ မျှားနေတယ်လို့ သံသယဝင်ကြတယ်။ အဲဒါနဲ့ပတ်သက်ပြီး ဘာများပြောလိုပါသလဲ။
အဖြေ....။ ကျွန်မက အစိုးရ အဖွဲ့အစည်း တစ်ဖွဲ့လုံးနဲ့ မတွေ့ဖူးဘူး။ ကျွန်မ သေသေချာချာ စကားပြောဖူးတာက ဝန်ကြီးဦးအောင်ကြည်နဲ့ သမ္မတကြီး ဦးသိန်းစိန်။ ဝန်ကြီး ဦးအောင်ကြည် ကလည်း သမ္မတကြီး ဦးသိန်းစိန်ရဲ့ ညွှန်ကြားချက်အရ ပြောတာဆိုတော့ ကျွန်မအနေနဲ့ ပြောနိုင်တာက သမ္မတကြီး ဦးသိန်းစိန်ကတော့ အကောင်း ဘက်ကို သွားချင်တဲ့ဆန္ဒရှိတယ်လို့ ကျွန်မယုံကြည်တယ်။ တချို့က ပြောတာပေါ့။ အသုံးချ ခံနေရတယ်ဆိုတာ။ အဲဒီဟာကလေ ဘာအတွက် အသုံးချလဲပေါ်မှာ တည်တာပါ။ တိုင်းပြည်အတွက် အသုံးချတယ်ဆိုလည်း အသုံးချပေါ့။ ရပါတယ်။ ဘာအတွက် အသုံးချတာလဲ။ ဒီလိုပေါ့နော်။ ရေတို အာဆီယံ ဥက္ကဋ္ဌတို့ ဘာတို့အတွက် အသုံးချတာလား ဆိုပြီး တချို့ကမေးတာမျိုး။ ဒါဟာ ဒီလိုသံသယနဲ့ပဲ ကြည့်နေမယ်ဆိုရင် ကျွန်မတို့ အလုပ်က ဆက်လို့ရမှာ မဟုတ်ဘူး။ သတိနဲ့ သံသယဆိုတာ မတူဘူး။ ကျွန်မ အမြင်မှာတော့ ဘာပဲလုပ်လုပ် သတိဆိုတာတော့ ရှိရမယ်။ သတိဆိုတာ ကတော့ လွန်ကဲတယ်လို့ မထင်ဘူး။ မဖြစ်မြောက်သေးခင်မှာ ဖြစ်နိုင်တဲ့ အထစ်အငေ့ါတွေနဲ့ ပတ်သက်ပြီး သတိက အမြဲရှိရမယ်။ သံသယ ဆိုတာနဲ့မတူဘူး။ သံသယဆိုတာ အင်မတန်မှ အဖျက်အဆီးသဘော ဖြစ်နိုင်တယ်။ သတိဆိုတာတော့ အဖျက်အဆီးသဘော မဟုတ်ပါဘူး။
အမေး......။ကျွန်တော်တို့ သတင်း ဖတ်လိုက်ရတယ်။ ၂ဝ၁၄ အာဆီယံဥက္ကဋ္ဌ နေရာအတွက်ကို အန်တီ့ရဲ့သဘောထားကိုပါ သူတို့မေးချင်တယ်ဆိုတာ။
အဖြေ........။ပြောသင့်တာ ရှိရင်တော့ ပြောရမှာပေါ့။ နိုင်ငံရေးသမားအလုပ်က မေးရင် ဖြေရမှာပေါ့။
အမေး......။အန်တီ့အနေနဲ့ ပြည်တွင်းငြိမ်းချမ်းရေး လှုပ်ရှားမှုထဲမှာ ပါဝင်ဆောင်ရွက်မယ်လို့ ပြောထားတယ်။ လွှတ်တော်မှာ ငြိမ်းချမ်းရေး ကော်မတီဖွဲ့တော့ အန်တီ့ကို မထည့်ထား ဘူး။ အန်တီ့ အနေနဲ့ ပြည်တွင်း ငြိမ်းချမ်းရေး ရရှိဖို့အတွက် သီးခြား လှုပ်ရှားမှုမျိုး လုပ်ဖို့ရှိလား။
အဖြေ........။ငြိမ်းချမ်းရေး အတွက်လုပ်တယ်ဆိုတာ တစ်ဦးတစ်ယောက်တည်း လုပ်လို့လည်း မရပါဘူး။ အဲဒီတော့ ကျွန်မအနေနဲ့ကတော့ ဘယ်သူပဲ ငြိမ်းချမ်းရေးရအောင် လုပ်နိုင်လုပ်နိုင် တကယ်လုပ်နိုင်ရင် ကျွန်မ ကျေနပ်ပါတယ်။ ကျွန်မ လုပ်ရမယ်လို့လည်း အဲဒီစိတ်မျိုး မရှိပါဘူး။ တကယ် ကျွန်မပါဝင်လုပ်လို့ ပိုအထောက်အကူ ဖြစ်မယ်ဆိုရင် လုပ်ဖို့အဆင်သင့်ပဲလေ။ ဒါပေမဲ့ ဒါကို လုပြီး လုပ်ဖို့မဟုတ်ပါဘူး။ ကိုယ်ကနေပြီး ဖြည့်ဆည်းပေးချင်တဲ့ သဘောပါ။
အမေး......။တိုင်းပြည် တစ်ပြည်ရဲ့ဆင်းရဲနွမ်းပါးမှု ပပျောက်ရေးမှာ လူလတ်တန်းစားတွေ များလာမှဖြစ်မယ် လို့ တချို့ကပြောကြတယ်။ အဲဒီအပေါ်ဘယ်လိုများ မြင်မိပါသလဲ။
အဖြေ......။ဒါကတော့ မှန်ပါတယ်။ လူလတ်တန်းစား ဆိုတာက ပြည့်ပြည့်စုံစုံ အရမ်းကျိကျိတက် ချမ်းသာတာမျိုး မဟုတ်ဘူးပေါ့နော်။ ပြည့်ပြည့်စုံစုံ သိက္ခာရှိရှိ နေနိုင်မယ့် အဆင့်ရှိတဲ့သူတွေ အများစုဆိုတာ ကောင်းတာပေါ့။ ဒါပေမဲ့လည်း တကယ် အကောင်းဆုံး ဆိုလို့ရှိရင် ဒီ လူလတ်တန်းစားလို့ ပြောလိုက်တဲ့ အခါကျတော့ ဒီလူလတ် တန်းစား အောက်မှာလည်း ရှိသေးတယ်လို့ သဘော မရောက်သွားဘူးလား။ အဲဒီလို မရှိတာတော့ အကောင်းဆုံးပေါ့။ လူလတ်တန်းစား ရှိတယ်ဆိုတာ ကောင်းပေမယ့် လူလတ်တန်းစားလို့ သုံးကတည်းက သူ့အောက်မှာ နိမ့်တဲ့လူတွေ ရှိသေးတယ်ဆိုတဲ့ သဘောပေါ့။ တတ်နိုင်သမျှ ဒီဟာကို ပြုပြင်ယူရမယ်။
အမေး.....။အာရပ်ကမ္ဘာရဲ့ ဒီမိုကရေစီရေး လှုပ်ရှားမှုဆီကနေ ဘာတွေ သင်ယူသင့်ပါသလဲ။
အဖြေ....။တချို့ကပေါ့နော်။ အာရပ်ကမ္ဘာ မှာ မြန်မြန်ဆန်ဆန် ပြောင်းလဲသွားပြီ ဆိုတာကို အားကျတာပေါ့နော်။ ကျွန်မကလည်း အားကျတာပေါ့။ မြန်မြန်ဆန်ဆန် ပြောင်းလဲ တယ် ဆိုတော့ အားကျတာပေါ့။ ဒါပေမဲ့ အာရပ်ကမ္ဘာမှာ လစ်ဗျားလည်း ပါတယ်။ လစ်ဗျားကျတော့ ဘယ်လောက် ပြည်သူတွေ နာလဲ။ ဘယ်လောက် တိုင်းပြည်နာလဲ။ ဒီဒဏ်ရာဒဏ်ချက် တွေကိုပျောက်ဖို့ ဘယ်လောက် ကြာဦးမှာလဲ။ အဲဒါတွေက အများကြီးထည့် စဉ်းစားရမယ်။ တခြားနိုင်ငံတွေမှာ ဆိုလို့ရှိရင် ခု အစကနေ စသွားပြီ။ နောက်ဘယ်လိုဆက်ပြီး ခရီးဆက်ဦးမလဲ ဆိုတာလည်း ကြည့်ရဦးမယ်။ ကိုယ့်နိုင်ငံ သူ့နိုင်ငံ တစ်ပုံစံတည်းတော့ မဖြစ်နိုင်ပါဘူး။ တိုင်းပြည်ချင်း က တစ်ပုံစံတည်းမှ မဟုတ်တာ။
အမေး....။ကျွန်တော်တို့ နိုင်ငံမှာ ဒီမိုကရေစီ ယဉ်ကျေးမှု ထွန်းကားဖို့အတွက် ပြည်သူတစ်ဦးချင်းစီရဲ့ တာဝန်က ဘာလဲ။ အစိုးရကရော ဘာတွေလုပ်ပေးရမလဲ။
အဖြေ.......။အစိုးရကတော့ ဒီမိုကရေစီ ထွန်းကားစေချင်ရင် နံပါတ်တစ် အရေးကြီးတာက ဥပဒေ စိုးမိုးရေးပဲ။ ဥပဒေစိုးမိုးရေး ရှိမှသာလျှင် ပြည်သူလူထုကလည်း လုပ်ရဲကိုင်ရဲ ပိုပြီး ဖြစ်လာမယ်။ လုပ်နိုင် ကိုင်နိုင် ဖြစ်လာမယ်။ ဥပဒေစိုးမိုးရေး ရှိရမယ်။ အဲဒီ ဒီမိုကရေစီ အဆောက်အအုံကို ခိုင်မြဲအောင် တည်ဆောက်တယ် ဆိုတာ ဥပဒေ စိုးမိုးရေးက အရေးကြီးတယ်။ ဒါကြောင့် NLD ဟာ ဆိုလို့ရှိရင် လူတွေငြီးငွေ့လောက်အောင် ဥပဒေစိုးမိုးရေး ကိစ္စကို ထပ်တလဲလဲ ပြောနေတာ။ ဒါဟာ သိပ်အခြေခံ ကျလွန်းလို့ပါ။
အမေး.....။နိုင်ငံရေးကို တကယ် စနစ်တကျ လေ့လာချင်တဲ့ လူငယ်တွေအပေါ် ဘယ်လိုများ လမ်းညွှန်ချက် ပေးချင်ပါသလဲ။
အဖြေ........။အဲဒါကတော့ တစိုက်မတ်မတ် လုပ်ရမယ်။ ကျွန်မတို့ကလေ။ ကံကောင်း တယ်ပဲ ပြောရမလားပေါ့နော်။ နိုင်ငံရေးနဲ့ ပတ်သက်လို့ ဒီနိုင်ငံရေး အသိုင်းအဝိုင်းထဲမှာ ကြီးလာ တယ်။ နိုင်ငံရေး အသိုင်းအဝိုင်းထဲမှာ ကြီးလာတဲ့အခါကျတော့ နိုင်ငံရေးဗီဇပါရင်၊ နိုင်ငံရေးကို စိတ်ဝင်စားလို့ရှိရင် လေ့လာနိုင်တဲ့ အခွင့်အရေးတွေ အများကြီး ရခဲ့တယ်။ စိတ်မဝင်စားလို့ ရှိရင်တော့ ဘယ်လိုပဲ အသိုင်းအဝိုင်းက ဘယ်လိုပဲဖြစ်ဖြစ်ပေါ့နော်၊ ဒါတွေက လေ့လာတဲ့ အခြေအနေရောက်မှာ မဟုတ်တော့ဘူး။ ငယ်ငယ် ကတည်းက နိုင်ငံရေး စကားတွေ ကြားနေရတယ်။ နောက်ပြီးတော့ ကျွန်မတို့ ကြီးလာတဲ့ ကလေးဘဝတုန်းက ဘာကံကောင်းသေးလဲ ဆိုတော့ သတင်း လွတ်လပ်ခွင့် တွေရှိတာ။ ကောင်းကောင်း မှတ်မိတာက အိမ်မှာဆိုလို့ရှိရင် သတင်းစာ သုံးလေးစောင် ယူတယ်။ သုံးလေးစောင် ယူပြီးတော့ လူကြီးတွေ ပြောနေတာ ကြားတာပေါ့နော်။ ဒီသတင်းစာကဖြင့် အစိုးရကို ထောက်ခံတယ်။ ဒီသတင်းစာကဖြင့် အတိုက်အခံကို ထောက်ခံတယ်။ စသည်ဖြင့် ပေါ့နော်။ ဒီသတင်းစာကဖြင့် အတင်းအဖျင်းဘက်ကို ပိုပြီးတော့ အားသန်တယ်။ အဲဒီဟာတွေကို ငယ်ငယ်ကတည်းက သိနေတယ်။ လူကြီးတွေက သတင်းစာထဲက ဆောင်းပါးတွေကို ကျယ်ကျယ် ဖတ်တဲ့အလေ့ရှိတယ်။ ကလေးတွေကလည်း ကြားတာပေါ့နော်။ တချို့ဟာတွေ နားမလည်ဘူး။ တချို့ဟာတွေတော့ နားလည်တယ်။ တဖြည်းတဖြည်း နားလည်တာပေါ့နော်။ အဲဒီတော့ ငယ်ငယ်ကတည်းကနေ ပြီးတော့ နိုင်ငံရေးနဲ့ ပတ်သက်လို့ သိတတ်မှုပေါ့။ နိုင်ငံရေးနဲ့ ပတ်သက်တဲ့ စိတ်ဝင်စားမှုဟာ လေ့ကျင့်ယူမှ ဖြစ်တာ။ နိုင်ငံရေးနဲ့ ပတ်သက်တဲ့ စာအုပ်တွေ ဖတ်လို့ရယ်လို့လည်း မဟုတ်ပါဘူး။ သတင်းတွေ နားထောင်ခြင်းအားဖြင့် သတင်းစာထဲက ဆောင်းပါးတွေ လေ့လာခြင်းအားဖြင့်၊ အဲဒီအတွက်ကျတော့ သတင်း လွတ်လပ်ခွင့်က အများကြီး အရေးကြီးတယ်။
အမေး.....။သတင်း လွတ်လပ်ခွင့် အပြင်ကို၊ လူကြီးတွေကရော ကျယ်ကျယ်ဖတ်တဲ့ အလေ့အထရယ်၊နောက် ပြီးတော့ မှန်တာရေးတာတွေရယ်၊ အဲဒါတွေက ကလေးတွေ မျိုးဆက် အတွက် ပိုအကျိုးပြုတဲ့ သဘောပေါ့။
အဖြေ.....။လူကြီးတွေကလည်း အဲဒီတုန်းက ကျယ်ကျယ်ဖတ်တယ်ဆိုတာ မကြောက်လို့ပေါ့နော် (ရယ်လျက်) အဲဒါအရေးကြီးတယ်လေ။ ဘာမှ ကြောက်စရာ မလိုဘူးဆိုတော့ ကျယ်ကျယ် ဖတ်ကြတာပေါ့။ ဖတ်ပြီးတော့ ကောက်နုတ်ချက်တွေ လည်းချတာပေါ့။ ကျွန်မတို့ ငယ်ငယ်တုန်းကဆိုရင် အစိုးရကို ဝေဖန်တာတွေ အများကြီးပဲ။ ဝန်ကြီး ချုပ်တွေ၊ ဝန်ကြီးတွေကို ဝေဖန်တာတွေ၊ လူကြီးတွေကလည်း အဲဒီဟာတွေကို မြိန်ရေယှက်ရေ ဆွေးနွေးကြတာပဲ။ ဆွေးနွေးတော့ ကျွန်မ တို့နားထဲမှာ အစိုးရဆိုတာ ဝေဖန်ခံရတယ်။ ဝန်ကြီးချုပ်ဆိုပေမယ့် ဝန်ကြီးချုပ်ဟာ ဝန်ကြီးချုပ်ပဲ။ ဝန်ကြီးချုပ်ကို မကြိုက်လည်း ပြောမှာပဲ။ ဝန်ကြီးချုပ်ဆိုတာ ကြောက်စရာလည်း မဟုတ်ဘူးပေါ့နော်။ ထူးထူးခြားခြား လေးစားသင့်မှ လေးစားရမယ်။ ဝန်ကြီးချုပ်ဆိုတာ လေးစားစေချင် ရင် လေးစားအောင် နေ ရမယ်။ အဲဒါတွေကတော့ အလေ့အကျင့် လို ဖြစ်သွားတယ်။
အမေး........။အန်တီနဲ့ သမ္မတကြီးတွေ့ကြတော့ ဆင်းရဲမွန်းကျပ်နေတဲ့ ပြည်သူတွေ ဆီကနေ ဘာပြန်ကြားရသလဲ ဆိုတော့ တိုင်းပြည်က အဆင်ပြေတော့မယ်။ ငါတို့ဘဝတွေ လည်း အဆင်ပြေတော့မယ်လို့ ကြားရတယ်။ အဲဒီလို မျှော်လင့်နေတဲ့ ပြည်သူတွေကို အန်တီ့အနေနဲ့ ဘာများပြောချင်ပါသလဲ။
အဖြေ........။ဒီလိုမျှော်လင့်နေတာ သဘာဝ ကျပါတယ်။ ဘာလို့လဲဆိုတော့ ဒီလောက်တောင်မှ နှစ်ပေါင်းများစွာ ရုန်းကန်နေရတဲ့ ဘဝတွေဟာ အဆင်ပြေချင်ကြတာပေါ့။ ဒါပေမဲ့ ကျွန်မ ပြောချင်တာက ဥစ္စာရင်လို ဥစ္စာရင်ခဲ။ ကိုယ်ကလည်း တတ်နိုင်သမျှတော့ လုပ်ရမယ်။ ဘာပဲပြောပြော ဖြစ်သင့် တဲ့ကိစ္စကိုး။ ဖြစ်သင့် ပါတယ်။ ဖြစ်စေချင်ပါတယ် ဆိုတာလောက်တော့ ပြည် သူ့အသံကို ထွက်လာအောင် တတ်နိုင်သလောက် ကြိုးစားသွားရမယ်။ ကျွန်မတို့ ပြည်သူတွေက အရမ်းကြောက်နေ တယ်။ အခုထိက ကြောက်စိတ်က မကုန်သေးဘူး။ လွတ်လွတ်လပ်လပ် ပွင့်ပွင့် လင်း လင်း မပြောရဲကြသေးဘူး။ ဒါပေမဲ့ နည်းနည်းကတော့ စပြီးတော့ နည်းနည်းနဲ့ စွန့်စားတာ စရမှာ ပဲ။ နောက်ပြီးတော့ ပိုပြီး စွန့်စားရမယ်။ မီဒီယာလိုပေါ့နော်။ ကျွန်မ အမြဲပြောတယ်။ မီဒီယာက တွန်းမှ ရပါ မယ်။ ဆောင်းပါးတွေ တော်တော်များများဟာ တင်ကြည့်ကြ တာပဲ။ ပယ်တယ်ဆိုရင်လည်း ပယ် တယ်ပေါ့နော်။ ဒါပေမဲ့ မတင်ကြည့်ဘူးဆိုရင် ရမလား၊ မရလား ဘယ်သိမလဲ။ အဲဒီတော့ ပြည်သူလူထု အနေနဲ့ ဒီလိုပဲ။ နည်း နည်းလုပ် ကြည့်ပါ။ လုပ်ကြည့်မှ လုပ်လို့ရမလား၊ မရသလားဆိုတာ သိမှာပေါ့။ ပြည် သူပါမှ၊ နောက်ဆုံးကျတော့ ပြည်သူပါမှ၊ ဘယ်လို လုပ်ငန်းမျိုး မဆို နိုင်ငံ တစ်နိုင်ငံ အတိုင်းအတာ နဲ့ အောင်မြင် ဖို့ဆို ပြည်သူမပါလို့ကို မဖြစ်ဘူး။
No comments:
Post a Comment